ევროკავშირის ქვეყნების ელჩები საქართველოს ხელისუფლებასა და ოპოზიციას დიალოგისკენ მოუწოდებენ

0
1577

ევროკავშირის ქვეყნების ელჩები საქართველოს ხელისუფლებასა და ოპოზიციას დიალოგისკენ მოუწოდებენ, რათა ორმა მხარემ კომპრომისს მიაღწიოს.

თბილისში უკვე კვირაზე მეტია გრძელდება საპროტესტო აქციები. მომიტინგეებს ერთადერთი დაუკმაყოფილებელი მოთხოვნა დარჩათ, რომელიც შინაგან საქმეთა მინისტრ გიორგი გახარიას გადადგომას უკავშირდება. ისინი გახარიას 20−21 ივნისის ღამით აქციის სასტიკი მეთოდებით დარბევაში ადანაშაულებენ, მინიტრი კი აცხადებს, რომ ქვეყანას დიდი საფრთხე ააცილა, ვინაიდან არსებობდა ხელისუფლების დამხობის საფრთხე.

საქართველოში მიმდინარე მოვლენებს გამოეხმაურა ნიდერლანდების საელჩო, რომელმაც საკუთარ ფეისბუქ−გვერდზე მიმართვა გამოაქვეყნა.

„ევროკავშირის ქვეყნების ელჩების საგანგებო პოსტი: საჭიროა გამჭვირვალე, სწრაფი, ეფექტური გამოძიების ჩატარება 20 ივნისს გადამეტებული ძალის შესაძლო გამოყენებასთან, ასევე ძალადობრივი მოქმედების წაქეზებასთან დაკავშირებით, რამაც გამოიწვია პოლიციის პასუხი. ომბუდსმენის ჩართულობა უმნიშვნელოვანესია. მოვუწოდებთ მხარეებს დიალოგისა და კომპრომისისკენ“, — ნათქვამია მიმართვაში.

რაც შეეხება აშში-ის საელჩოს, დიპლომატიურ უწყებაში აღნიშნეს, რომ ისინი ყურადღებით აკვირდებიან მიმდინარე პროცესებს, რომლებიც 20 ივნისის მოვლენების შემდეგ განვითარდა.

„აშშ-ის საელჩო ყურადღებით აკვირდება 20 ივნისს თბილისის საპროტესტო აქციების შემდგომ განვითარებულ მოვლენებს საქართველოში. მიუხედავად იმისა, რომ მნიშვნელოვანია გამოძიებულ იქნას, როგორც ძალადობის აქტები, ისე დემონსტრანტების წინააღმდეგ ძალის გადამეტების შემთხვევები, ჩვენ მოვუწოდებთ მთავრობას, იმოქმედოს გაწონასწორებულად და თავშეკავებით“, — ნათქვამია აშშ−ის საელჩოს განცხადებაში.

უწყება აღნიშნავს, რომ „ახლა ყველაზე მეტად საჭიროა დიალოგი ყველა პოლიტიკურ პარტიას შორის საქართველოს დემოკრატიის გასაძლიერებლად“.

დატოვე პასუხი

Please enter your comment!
Please enter your name here